काठमाडौ अषाढ ३, नेपाल पत्रकार महासङ्घको केन्द्रीय समिति र हिमालयन टेलिभिजन प्रतिष्ठान शाखाले विगत तीन दिनदेखि ५ सूत्रीय माग राख्दै जारी गरेको धर्नासहितको आन्दोलनको कार्यक्रम स्थगित गरेको छ । आज व्यवस्थापन पक्षसँग महासंघका अध्यक्ष डा. महेन्द्र विष्ट, हिमालयन टेलिभिजनका कार्यकारी निर्देशक च्याङ अग्रवाल र हिमालयन टेलिभिजन प्रतिष्ठान शाखाका अध्यक्ष वाइपी घिमिरेवीच भएको वार्ता पछि ५ सूत्रीय सहमतिपत्रमा हस्ताक्षर गर्दै धर्नासहितको आन्दोलनको कार्यक्रम 
स्थगित गरेको हो ।
आज भएको सहमतिमा हिमालयन टेलिभिजनमा उपत्यका र उपत्यका बाहिर कार्यरत सबै श्रमजीवी पत्रकार, कर्मचारी, कामदारको गत चैतसम्मको बक्यौता पारिश्रमिक सहमति भएकै दिन आजै बैंकमार्फत भुक्तानी गर्ने र बाँकी दुई महिनाको असार १० गतेभित्र भुक्तानी गर्नुका साथै अबदेखि नियमितरूपमा मासिक पारिश्रमिक भुक्तानी श्रमजीवी पत्रकार ऐन, नियम र नियमावलीकाको कार्यान्वयन गर्ने लगायतका विषय रहेका महासङ्ले जनाएको छ ।
सहमतिपछि महासङ्घका अध्यक्ष विष्टले आन्दोलनमा सहभागिता र ऐक्यबद्धता जनाउने सबै प्रतिष्ठान शाखाका नेतृत्व र सञ्चार सम्बद्ध सबै सङ्घसंस्थालगायत सबै पत्रकार र सहमतिमा आउने हिमालयन व्यवस्थापन पक्षलाई धन्यवाद दिदै सहमति यथावत रूपमा कार्यन्वयन हुने विश्वास व्यक्त गर्नुभएको आज जारी विज्ञप्तिमा उल्लेख रहेको छ ।
