काठमाडौं वैशाख १९, गत शनिबार आएको विनाशकारी महाभूकम्पबाट नेपाल पत्रकार महासंघ, मकवानपुर शाखाका सदस्य तथा महासंघका केन्द्रीय सभासद् सुमन भोम्जनको दुःखद निधन 
भएको छ । भूकम्प आए लगत्तै सम्पर्कविहिन भोम्जनको निरन्तर खोजिपछि उनकै डेरा महाबौद्धमा पुरिएको अवस्थामा शनिबार मध्यान्ह शव फेला परेको हो । महाविपत्तिले देशैभर ठूलो धनजनको क्षति पु -याएको बेला भोम्जनको निधनले महासङंघ स्तब्ध भएको आज जारी शोक विज्ञप्तिमा उल्लेख गरिएको छ ।
त्यस्तै शोक विज्ञप्तिमा महासङघले पत्रकार भोम्जनप्रति हार्दिक श्रद्धाञ्जली अर्पण गर्दै शोक सन्तप्त परिवारप्रति धैर्यधारणाको कामना गर्दै गहिरो समवेदना प्रकट गरेको छ ।
यसैवीच पत्रकार महासङ्घ, गोरखापत्र प्रतिष्ठान शाखाले विगत चार वर्षदेखि गोरखापत्र दैनिकमा कार्यरत खेलकुद पत्रकार सुमन भोम्जनको गत शनिबारको भूकम्पमा परी मृत्यु भएकोमा दुःख व्यक्त गरेको छ ।
अत्यन्त मिलनसार, सहयोगी र उत्साही होनाहार पत्रकार भोम्जनको असामयिक निधनप्रति सिङ्गो गोरखापत्र संस्थान परिवार र नेपाल पत्रकार महासङ्घ गोरखापत्र प्रतिष्ठान शाखा मर्माहत भएको प्रतिष्ठानद्वारा आज जारी विज्ञप्तिमा उल्लेख गरिएको छ ।
