काठमाडौ चैत्र २७, बाग्मती सफाइ महाअभियान सञ्चालन भएको सयौँ हप्ता पुगेको अवसरमा आयोजना हुँदै गरेको मानव साङ्लो प्रदर्शन अभियानप्रति 
ऐक्यबद्धता जनाउँदै बाग्मती सफाइ महाअभियानमा सक्रिय सहभागिता जनाउन एमाओवादीले आ–आफ्ना नेता तथा कार्यकर्तालाई निर्देशन दिएको छ ।
एमाओवादीका महासचिव कृष्णबहादुर महराले काठमाडौँ उपत्यकाका तीन वटै जिल्लाका नेता तथा कार्यकर्ता, समर्थक तथा शुभेच्छुकलाई शनिबार आ–आफ्नो पायक पर्ने स्थानमा गई सफाइ अभियानमा सहभागी बन्न निर्देशन दिनुभएको हो ।
यसैवीच नेकपा–माओवादीका पार्टी प्रवक्ता पम्फा भुसालले आज विज्ञप्ति जारीगर्दै शनिवार हुने बाग्मती सफाइ महाअभियानको विशेष अभियानमा सहभागी हुन सम्पूर्ण पार्टी, जनवर्गीय सङ्गठनका नेता–कार्यकर्ता र आम जनतालाई अपिल गरेको छ । त्यस्तै विज्ञप्तिमा स्वच्छ र सफा बाग्मतीका लागि सभ्य नागरिकको भूमिका पूरा गर्न भोलि आ–आफ्नो अनुकूल स्थानमा उपस्थित भई महाअभियानमा सहभागी हुन आग्रह गर्नुभएको छ ।
