काठमाडौ चैत्र १२, नेपाल प्रेस युनियनका केन्द्रीय पार्षद प्रमोद पोखरेलकी आमा नमादेवी पोखरेलको बम विस्फोटमा परी निधन भएको घटनाको 
वास्तविकता बुझ्न युनियनले एक मिसन टोली गठन गरेको छ । घटनाको यथार्थ बुझेर प्रतिवेदन तयार पार्न युनियनले आज उपमहासचिव प्रेम केसीको संयोजकत्वमा सचिव केबी राना र मध्य पश्चिम क्षेत्रीय संयोजक देवेन्द्र बर्मा सदस्य रहेको मिसन टोली गठन गरेको हो ।
नमादेवी पोखरेलको यही चैत ५ गते प्यूठानको ओखरकोट गाविसस्थित आहालखोलामा बम विष्फोटमा परी निधन भएको थियो । उक्त घटना षडयन्त्रपूर्वक भएको आरोप लगाउँदै परिवारजनले छानबिनका लागि सरकारसँग माग गरेका छन् । त्यस्तै युनियनको बैठकले मृतक पोखरेलप्रति श्रद्धाञ्जलि व्यक्त गर्दै शोकसन्तप्त परिवारमा समवेदना प्रकट गरेको छ ।
