काठमाडौं पौष् ५, नेपाल पत्रकार महासङघले स्याङजाको स्थानीय सञ्चारमाध्यममा कार्यरत सञ्चारकर्मी युवतीमाथि भएको बलात्कार घटनामा पुनरावेदन अदालत पोखराले गरेको ५ वर्षअघिको उक्त फैसलालाई उल्टाउँदै आरोपीलाई सर्वोच्च अदालतले कसुरदार ठहर गर्दै सुनाएको फैसलके स्वागत गरेको छ ।
महासङघले पाँच वर्षपछि भएपनि एक सञ्चारकर्मीले न्याय पाएको उल्लेखगर्दै शुक्रवार जारी विज्ञप्तिमा मार्फत फैसलाको स्वागत गरेको हो । महासङघका सचिव सङगीता खड्काले जारीगरेको विज्ञप्तिमा फैसला स्वागत योग्य भएपनि आरोपीलाई तोकिएको कैद र क्षतिपूर्ति भने निकै कम भएको महासङघले महसुस गरेको उल्लेख गरेकी छन् । सर्वोच्चले आरोपी घिमिरेलाई ५ वर्ष कैद र डेढ लाख क्षतिपूर्ति भर्नुपर्ने फैसला सुनाएको हो ।
२०६४ पुसमा नेपाल टेलिकम स्याङजाका अधिकृत यादव घिमिरेले जागिर लगाइदिने प्रलोभन दिएर पोखरा लगी सञ्चारकर्मी युवतीको बलात्कार गरेका थिए । सुरु मुद्दामा जिल्ला अदालत कास्कीले घिमिरेलाई दोषी ठहर गरेको थियो । पछि घिमिरे पुनरावेदन गएपछि त्यहाँबाट सफाई पाएका थिए । त्यस्तै विज्ञप्तिमा महासंङघले पीडितलाई न्याय दिलाउन सहयोग गर्ने विभिन्न संघ–संस्था, कानुनविद् र पत्रकार लगायतलाई धन्यावद दिएको छ । आगामी दिनमा पत्रकारको पेशागत र भौतिक सुरक्षामाथि हुने यस किसिमको घटनाको सुनुवाई छिटो होस भन्ने महासंघले अपेक्षा राखेको जनाइएको छ ।
पटकपटक सुनुवाई रोकिदै आएको उक्त मुद्दामा महासंघको कानुनी डेस्कबाट पनि न्यायका लागि पहल गरिएको थियो । उक्त मुद्दाको बन्द इजलासमा सुनुवाई भैरहेको बेलामा महासंघका अध्यक्ष महेन्द्र विष्टलगायत पदाधिकारीहरुको अदालत परिसरमा उपस्थिति रहेको थियो ।