धादिङ असोज १३, खचाखच यात्रु लिएर विराटनगरतर्फ जाँदै गरेको यात्रुबाहक बस म्याग्दीबाट काठमाडाँैतर्फ जाँदै गरेको अर्को बससँग आज बिहान ठोक्किँदा पाँचजनाको 
मृत्यु भएको छ भने ५० भन्दा बढी घाइते भएका छन् । पृथ्वीराजमार्गअन्तर्गत धादिङको भुमेस्थान–सिम्ले बजारमा विपरीत दिशाबाट गुडेको दुईवटा बस एकआपसमा ठोक्किँदा सो दुर्घटना भएको हो ।
बेनीबाट काठमाडौँ जाँदै गरेको ना३ख ७६३३ र काठमाडौँबाट झापा काँकडभिट्टा जाँदै गरेको यात्रुबाहक ना५ख ४३८४ नम्बरको बस एकआपसमा ठोक्किएको प्रहरीले जानकारी दिएको छ । दुर्घटनामा मृत्यु हुनेमा काठमाडौँ विशालनगरकी ३० वर्षीया छुलीकान्छी र उनकी छ वर्षकी छोरी कीर्तिका थापामगर, बसका चालक म्याग्दी पाङ गाविसका किसान भन्ने विष्णुबहादुर कार्कीको मृत्यु भएको प्रहरी निरीक्षक प्रेमबन्धु पोखरेलले बताउनुभयो । बेनीबाट काठमाडौँ जाँदै गरेको बसमा सवार तीनजनाको मृत्यु भएको हो । बाँकीको सनाखत हुन सकेको छैन । मृतक सबै चालक बसको छेउमा बसेका थिए ।
दुर्घटनामा १५ जना गम्भीर घाइते छन् । उनीहरूलाई उपचारका लागि काठमाडौँ पठाइएको महादेवबेसी प्रहरी चौकीका प्रहरी सहायक निरीक्षक हरिओम शाहीले जानकारी दिनुभयो । बाँकी घाइतेको स्थानीय स्वास्थ्य केन्द्रमा उपचार भइरहेको छ । तीव्रगतिमा गुडेका थिए दुवै बस । ना३ख ७६३३ नम्बरको बसले साइड च्याप्दा दुर्घटना भएको प्रत्यक्षदर्शीले जानकारी दिएका छन् । केहीबेर सडक अवरुद्ध भएको थियो हाल साना सवारी एकतर्फी सञ्चालनमा आएका छन् । घटनास्थलमा महादेवबेसी प्रहरी चौकी, सशस्त्र प्रहरी बल, स्थानीय बासिन्दा, राजमार्ग दुर्घटना उद्धारक स्वयम्सेवकले उद्धार गरेका थिए । रासस
