काठमाडौ असोज २, बुद्धका सम्बन्धमा रहेका भ्रमहरु हटाउन तिनै भ्रमहरुमा नै केन्द्रीत भएर तयार पारिएको पुस्तक ‘बुद्ध एक भ्रम अनेक’ प्रकाशित भएको छ । गौतम बुद्धका सम्बन्धमा विभिन्न खालका भ्रमहरु चिर्ने क्रममा बौद्ध धर्म दर्शन तथा इतिहासका अध्येता एवं लेखक बसन्त महर्जनले सो पुस्तक तयार पारेका हुन् । इन्साइट पब्लिकेशन प्रा. लि.बाट प्रकाशित लेखकको यो छैठौं बौद्ध पुस्तक हो ।
लेखक महर्जनका अनुसार गौतम बुद्धको प्रशंसा र बढाईचढाई गर्ने क्रममा बुद्ध धर्मका मूलभूत कुरासँग नै बाँझिन पुग्ने र त्यसबाट प्रसस्त मात्रामा भ्रम सिर्जना हुने गरेको छ । उनका अनुसार बुद्ध र धर्मसम्बन्धी आधारभूत ज्ञानको अभावमा अन्य धर्मावलम्बीहरुमा मात्रै नभएर परम्परादेखि आफूलाई बौद्धका रुपमा पहिचान दिँदै आएकाहरुमा पनि यस्ता भ्रम रहेका कारण तिनै भ्रमहरुमा केन्द्रित गरेर छलफल चलाउनु आवश्यक रहेको छ । पुस्तकमा ती भ्रमहरुलाई व्याख्यासहित खण्डन गरेको छ ।
विभिन्न धर्महरुको अभ्यास हुने नेपालमा अन्य धर्मावलम्बीहरु पनि बुद्धप्रति उत्तिकै सहिष्णुता राख्ने गर्दछन् र प्रशंसा पनि गर्दछन् । बुद्ध, धर्म संस्कृति, इतिहास तथा पुरातत्वसम्बन्धी पत्रपत्रिकामा लेख, रचना प्रकाशित गराउँदै आएका लेखक महर्जनको यसअघि ‘लुम्बिनी ः ऐतिहासिक तथा पुरातात्विक अध्ययन’, ‘गन्तव्य लुम्बिनी’, ‘गौतम बुद्ध’, ‘बुद्धको आत्मकथा’, ‘बुद्ध र महिला’ गरी पाँच वटा पुस्तक प्रकाशित छन् ।