काठमाडौँ श्रावण १७, गृह मन्त्रालयले सिन्धुपाल्चोकको माङ्खा गाविसको जुरेमा आएको पहिरोबाट थुनिएको सुनकोशी नदी खुलाउन नेपाली सेनाको नेतृत्वमा गएको प्राविधिकसहितको टोलीले विस्फोट गराएको र हाल सो स्थानबाट पानीको निकास हुन थालेको जनाएको छ ।
गृह मन्त्रालयका प्रवक्ता लक्ष्मीप्रसाद ढकालद्वारा आज साँझ जारी विज्ञप्तिमा उल्लेख भए अनुसार तल्लो तटीय क्षेत्रमा आउनसक्ने बाढी र सोबाट हुनसक्ने जनधनको क्षतिप्रति सावधानी अपनाउन प्रभावित हुनसक्ने जिल्लाका प्रमुख जिल्ला अधिकारीलाई सम्भावित जोखिमयुक्त क्षेत्रबाट सर्वसाधारणलाई सुरक्षित स्थानमा स्थानान्तरण गर्न र घाइते भएकाहरूको उपचारको व्यवस्था मिलाउन निर्देशन दिएको जनाएको छ ।
त्यस्तै गरि विज्ञप्तिमा पहिरोबाट उत्पन्न समस्यालाई प्रभावकारी रुपमा सम्बोधन गर्न मन्त्रालयमा विपद् व्यवस्थापन महाशाखा प्रमुखको संयोजकत्वमा कमाण्ड पोष्ट खडा गरी निरन्तर सूचना सङ्कलन, समन्वय, अनुगमन र निर्देशनसमेत भइरहेको भन्दै पहिरोमा परि हालसम्म आठ जनाको मृत्यु भएको र २० जना घाइते भएकामा गम्भीर घाइते सात जनालाई हेलिकोप्टरबाट उद्धार गरी थप उपचारका लागि काठमाडौँ ल्याइएको विज्ञप्तिमा जनाइएको छ ।