भक्तपुर श्रावण २, मध्यपुरथिमि नगरपालिका–१४ स्थित स्पाइन्डिङ इन्डस्ट्रिज धागो उद्योगभित्र २२ हजार ८७० बोरा चिनी लुकाई राखिएको अवस्थामा भेटिएको छ । कालाबजारी गर्ने उद्देश्यले चिनी लुकाएको उजुरी परेपछि जिल्ला प्रशासन कार्यालय भक्तपुरका प्रशासकीय अधिकृत उमेश दाहालको नेतृत्वमा गएको टोलीले ती चिनी अवैध भएको आशङ्कामा आज सिलबन्दी गरेको हो ।
धागो कारखानाभित्र ११ लाख ४३ हजार ५०० किलो चिनी त्रिपालले छोपेर लुकाई राखिएको अवस्थामा भेटिएपछि अवैध भएको आशङ्कामा सिलबन्दी गरेको उहाँले बताउनुभयो । उक्त चिनी महोत्तरीको शशिकान्त अग्रवालको भएको बुझिएको बताउँदै उहाँले चिनी अवैध नभएको प्रमाणसहित प्रशासनमा हाजिर हुन आग्रह गरेको छौँ भन्नुभयो ।