पर्सा ज्येष्ठ ३, वीरगन्ज भन्सारबाट जाँचपास भई भारततर्फ लैजान लागिएको रु ३३ लाख मूल्यबराबरको सुपारी नियन्त्रणमा लिई आज अञ्चल प्रहरी कार्यालय नारायणी वीरगन्जले सार्वजनिक गरेको छ । वीरगन्जबाट भारततर्फ गइरहेको युपी७८बिएन १०४९ नम्बरको ट्रकमा राखिएको १७ टन अवैध सुपारीसहित तीन जना भारतीय नागरिकलाई वीरगन्जको शङ्कराचार्य गेट अगाडिबाट अञ्चल प्रहरीले नियन्त्रणमा लिएको हो ।
वीरगन्जबाट भारततर्फ सुपारी लैजान लागिएको सूचनाको आधारमा प्रहरीले कारबाही गर्दा अवैध सुपारीसहित भारतको सुक्लागन्ज निवासी किशोरी जैशवाल, शिवकुमार गौतम र सुगवा निवासी लालजित राजवंशीलाई पक्राउ गरिएको अञ्चल प्रहरी कार्यालय नारायणीका प्रमुख वरिष्ट प्रहरी उपरीक्षक सर्वेन्द्र खनालले जानकारी दिनुभयो । प्रहरीले बरामद गरेको सुपारी र पक्राउ गरिएका भारतीय नागरिकलाई आवश्यक कारबाहीका लागि राजस्व अनुसन्धान कार्यालय पथलैयामा बुझाउने तयारी भएको वरिष्ठ प्रहरी उपरीक्षक खनालले जानकारी दिनुभयो । rss