काठमाडौँ ज्येष्ठ १२, प्रधानमन्त्री नरेन्द्र मोदीको शपथ ग्रहण समारोहमा सहभागी हुन आज बिहान नयाँदिल्ली पुग्नुभएका प्रधानमन्त्री सुशील कोइरालालाई आज नयाँदिल्लीस्थित इन्दिरा गान्धी अन्तर्राष्ट्रिय विमानस्थलमा भारतीय विदेश मन्त्रालय र नेपाली दूतावासका वरिष्ठ कर्मचारीले स्वागत गरेका छन् ।
प्रधानमन्त्री कोइरालालाई भारतीय विदेश मन्त्रालयका सहसचिव, शिष्टाचार महापाल नेपालका लागि भारतीय राजदूत रञ्जित रे, नयाँदिल्लीस्थित कार्यवाहक नेपाली राजदूत कृष्णप्रसाद ढकाललगायत कर्मचारीले स्वागत गर्नुभएको हो । नवनिर्वाचित प्रधानमन्त्री मोदीको शपथ ग्रहण समारोह आज साँझ ६ बजे तय भएको छ । त्यसअघि प्रधानमन्त्री कोइरालाले निवर्तमान प्रधानमन्त्री डा मनमोहन सिंहलगायत उच्च पदाधिकारीलाई भेट्ने कार्यक्रम रहेको बुझिएको छ । यसैवीच प्रधानमन्त्री सुशील कोइराला इन्दिरा गान्धी अन्तर्राष्ट्रिय विमानस्थलमा अवतरण गरेलगत्तै राजनीतिक भेटघाटमा व्यस्त हुनुभएको समाचार स्रोतहरुले जनाएको छ ।
प्रधानमन्त्री कोइरालाले आज अपराह्न १६ः४५ बजे भारतका निवर्तमान प्रधानमन्त्री डा मनमोहन सिंहसँग उहाँको निवासमा भेट गर्ने र त्यस पछि प्रधानमन्त्री कोइराला नवनियुक्त प्रम नरेन्द्र मोदीको शपथग्रहण कार्यक्रममा सरिक हुने कार्यक्रम रहेको थाह भएको छ ।