काठमाडौँ वैशाख २२, आगामी जेठ १५ गते मनाइने गणतन्त्र दिवस २०७१ भव्य तथा उल्लासमय वातावरणमा मनाउन प्रधानमन्त्री सुशील कोइरालाको अध्यक्षतामा गणतन्त्र दिवस मूल समारोह समिति गठन भएको छ । समितिको आज सिंहदरवारमा बसेको बैठकमा गणतन्त्र दिवसलाई राष्ट्रिय दिवसको रूपमा मनाउन तीन दिने कार्यक्रमको घोषणा गरिएको छ ।
२२ सदस्यीय सो समितिमा प्रधानन्यायाधीश, सभामुख, मन्त्री, सभासद्, संवैधानिक अंगका प्रमुख, प्रतिष्ठान, विश्वविद्यालय, सेना–प्रहरी प्रमुख, राजनीतिकदलका प्रमुखहरूलगायत विशिष्ट व्यक्तिहरू, सरकारी अधिकारी, विभागीय प्रमुखहरू सदस्य रहनुभएको छ । त्यस्तैगरि गणतन्त्र दिवस मनाउन सूचना तथा सञ्चारमन्त्री डा.मिनेन्द्र रिजालको संयोजनमा २३ सदस्यीय प्रचारप्रसार उप–समिति, काठमाडौं महानगरपालिकाका प्रमुखको संयोजनमा आठ सदस्यीय मञ्च सजावट तथा मञ्च व्यवस्था उप–समिति र काठमाडौं जिल्ला प्रशासन कार्यालयका प्रमुखजिल्लाहधिकारीका संयोजनमा व्यवस्थापन समन्वय उप–समिति पनि सो वैठकमा गठन गरिएको छ ।