काठमाडौँ वैशाख ३०, सर्वोच्च अदालतले नेपाल पर्यटन बोर्डका कामु कार्यकारी निर्देशक सुवास निरौलालाई तत्काल काम गर्न कुनै पनि अवरोध नगर्न विपक्षीका नाममा अन्तरकालीन आदेश दिएको छ । प्रधानन्यायाधीश दामोदरप्रसाद शर्मा र न्यायाधीश गिरिशचन्द्र लालको इजलासले आगामी 
जेठको दोस्रो सातासम्म निरौलालाई काममा कुनै पनि अवरोध नगर्न आदेश दिएको हो ।
बोर्डमा अनियमितता भएको र मनपरीतन्त्र मौलाएको भन्दै कामु कार्यकारी निर्देशक निरौलालाई तत्काल पदबाट वर्खास्त गर्न रघु विष्टलगायतले यही वैशाख २५ गते सर्वोच्चमा रिट दायर गर्नुभएको थियो । बोर्डमा अनियमितता भएको भन्दै पर्यटन व्यवसायीहरूले केही दिनदेखि आन्दोलन गर्दै आएका छन् । पर्यटन व्यवसायीहरूले बोर्डको कार्यालयमा तालाबन्दी गर्दै कार्यालय प्रवेश गर्न नदिएपछि निरौलाले पदमा कायम रही काम गर्न पाउँ भनी यही वैशाख २४ गते रिट दायर गर्नुभएको थियो ।
