पोखरा वैशाख १४, कास्कीको सिल्दुजुरे –९ बाहुनडाँडामा निर्माणाधीन माथिल्लो मादी जलविद्युत् आयोजनाको सुरुङ खन्ने क्रममा माथिबाट पहिरो आई 
थुनिएर बेपत्ता भएका स्काभेटरका चालक सुजन गुरुङको शव शनिबार साँझ बाहिर निकालिएको छ । तनहुँ दुलेगौंडा घर भएका गुरुङको शव परीक्षणका लागि पश्चिमाञ्चल क्षेत्रीय अस्पतालमा पठाइएको जिल्ला प्रहरी कार्यालय कास्कीले जनाएको छ । बेपत्ता हुने उदयपुर जिल्ला चौधन्नी गाविसका अन्य दुई मजदुर नगेन्द्र तामाङ र अर्जुन तामाङको खोजी भइरहेको छ ।
उनीहरु बेपत्ता भएको धेरै समय भइसकेकाले जीवित रहने अवस्था क्षीण बन्दै गएको प्रहरीले जनाएको छ । थुनिएर सम्पर्कमा आएका १३ मजदुरलाई भने १३ घन्टापछि सकुशल उद्धार गरी बाहिर निकालिएको थियो । बेपत्ता दुई मजदुरको खोजीका लागि नेपाली सेना, सशस्त्र प्रहरी, नेपाल प्रहरी र स्थानीय जनतासमेत १५० जनाको टोली कार्यरत रहेको बताइएको छ ।
