काठमाडौं चैत्र २६, सत्तारुढ नेपाली काङ्ग्रेस र नेकपा एमालेका प्रभावशाली नेताहरुले संविधानसभाको अधिकारलाई कुण्ठित पार्ने भन्दै उच्चस्तरीय 
राजनीतिक समिति गठन गर्नु आवश्यक नरहेको बताएका छन् । रिपोर्टर्स क्लबले मंगलवार राजधानीमा गरेको कार्यक्रममा नेपाली काङ्ग्रेसका रमेश लेखकले संविधानसभा बाहिर छलफल र निर्णय हुने गरि कुनै समिति गठन गर्न नहुने धारणा राख्नुभएको हो । संविधानसभाभित्र सबै पार्टीका शीर्ष नेताहरु रहेको र उनीहरु सदस्य रहने गरी राजनीतिक संवाद समिति समेत गठन गर्ने व्यवस्था भएकोले संविधानसभा बाहिर कुनै समिति बन्न नहुने उहाँको तर्क थियो ।
यस्तै कार्यक्रममा नेकपा एमालेका प्रचार विभाग प्रमुख प्रदीप ज्ञवालीले उच्चस्तरीय राजनीतिक समिति गठन भए संविधानसभा र दलहरुवीच द्वन्द्व बढाउने दाबी गर्दे छुट्टै समिति नबनाउन दलहरुलाई सुझाव दिए । संविधान निर्माण बारेको सवै छलफल र निर्णय संविधानसभा अन्तर्गतकै समितिमा हुनुपर्ने भन्दै ज्ञवालीले समिति आवश्यक नरहेको बताए । तर एनेकपा माओवादीका नेता हरिबोल गजुरेलले भने दलहरुले पहिल्यै सहमति बनिसकेकोले उच्चस्तरीय राजनीतिक समिति गठन गर्नुपर्नेमा जोड दिए ।
