काठमाडौं चैत्र ११, राष्ट्रपति रामवरण यादवले संविधान निर्माण प्रक्रियामा नेतृत्वदायी भूमिका निर्वाह गर्न एमाओवादीका अध्यक्ष पुष्पकमल दाहाललाई आग्रह गर्नुभएको छ । राष्ट्रपति यादवले अध्यक्ष दाहालसंग सोमवार विहान गर्नु भएको भेटमा यस्तो आग्रह गर्नुभएको हो ।
संविधान निर्माण र शान्ति प्रक्रियालाई निष्कर्षमा पुर्याउने सम्बन्धमा आफूले अध्यक्ष दाहालबाट नेतृत्वदायी भूमिकाको अपेक्षा गरेको उहाँको भनाई थियो ।
जवाफमा अध्यक्ष दाहालले संविधानसभामा प्रमुख प्रतिपक्षी दल भएपनि संविधान निर्माणको जिम्मेवारीबाट आफूहरु कहिल्यै पछि नहट्ने बताउँदै संविधान निर्माणकोलागि रचनात्मक प्रतिपक्षीको भूमिका निर्वाह गर्न एमाओवादी प्रतिबद्ध रहेको बताउँनुभएको बुझिएको छ।