काठमाडौँ फागुन १७, फागुन २० गते म्यान्मारको राजधानी नेपिटमा सुरु हुने बहुपक्षीय बिम्स्टेकको तेस्रो शिखर सम्मेलनमा भाग लिने नेपाली प्रतिनिधिमण्डलको नेतृत्व गर्दै प्रधानमन्त्री सुशील कोइराला आइतबार त्यसतर्फ प्रस्थान गर्दै हुनुहुन्छ । प्रतिनिधिमण्डलमा प्रधानमन्त्रीका स्वकीयसचिव, परराष्ट्रमामिला सल्लाहकार, निमित्त परराष्ट्र सचिव, नेपाल सरकारका अन्य वरिष्ठ अधिकारी सहभागी रहनेछन ।
त्यस्तै प्रधानमन्त्री कोइरालाले सदस्य मुलुकका राष्ट्र/सरकार प्रमुख सभागी हुने उक्त सम्मेलनलाई सम्बोधन गर्नुहुनेछ । सम्मेलनअघि आज तयारी समिति, आइतबार वरिष्ठ अधिकारी तथा सोमबार मन्त्रिस्तरीय बैठक हुनेछ । सम्मेलनमा बङ्गलादेशमा बिम्स्टेकको स्थायी सचिवालय स्थापना, त्यसको महासचिवमा सुमिथा नाकन्दलाको नियुक्ति तथा भुटानमा सांस्कृतिक उद्योग आयोग र सांस्कृतिक उद्योग अवलोकन केन्द्र स्थापनासम्बन्धी समझदारीपत्रमा हस्ताक्षर हुने परराष्ट्र मन्त्रालयले जनाएको छ । प्रधानमन्त्री कोइरालाले शिखर सम्मेलनमा भाग लिने क्रममा भारत र बङ्गलादेशका प्रधानमन्त्रीसँग बेग्लाबेग्लै द्विपक्षीय भेटवार्ता गर्ने कार्यक्रम छ । प्रधानमन्त्रीेले विपक्षी नेत्री आङ सान सुचीसँग छलफल गर्र्नुहुने परराष्ट्र मन्त्रालयले आज जारी गरेको प्रेस विज्ञप्तिमा उल्लेख छ