काठमाडौं चैत १, बंगलादेशमा आईतवारदेखि सुरु हुँने २०–२० विश्वकप क्रिकेटमा पहिलो पटक सहभागिता जनाउँदै गरेको नेपालले पहिलो खेलमा चिरपरिचित 
प्रतिद्धन्द्धी हङकङको सामना गर्दैछ । हङकङ नेपालकै हैसियतको टिम भएकाले पनि नेपालले ठोस सुरुवात गर्ने विश्वास गरिएको छ । खेल नेपाली समय अनुसार साँझ सवा ७ बजे बंगलादेशको चट्गाउँमा सुरु हुनेछ ।यसअघिका वार्मअप खेलमा भने पराजित भएको नेपालका लागि ब्याटिङ लाइन सशक्त पार्न दबाब बढेको छ । तर, टी–२० मा नेपालको प्रदर्शन राम्रो हुने गरेकाले पनि पहिलो अनुभवमै ठोस नतिजा निकाल्नेमा आशावादी हुन सकिन्छ । चार टोली सहभागी समूहको शीर्ष टिमले विश्वकपको अर्को चरणमा ठाउँ बनाउने भएकाले पनि हरेक खेल महत्वपूर्ण रहेको सम्वद्ध विश्लेषकले बताएका छन ।
नेपाली टोलीमा कप्तान पारस खड्का र उपकप्तान ज्ञानेन्द्र मल्ल तथा अन्य खेलाडीमा शरद भेषवाकर, सागर पुन, सोमपाल कामी, प्रदीप एरी, अमृत भट्टराई, अनिल मण्डल, राहुल विश्वकर्मा, जितेन्द्र मुखिया, सुवास खकुरेल, वसन्त रेग्मी, विनोद भण्डारी र नरेश बुढाऐर छन् । समूह ‘ए’ मा नेपालसहित हङ्कङ, बङ्गलादेश र अफगानिस्तान तथा समूह ‘बी’ मा आयरल्यान्ड, नेदरल्यान्ड्स, युएई र जिम्बावे छन् । सन् २००७ देखि भएको टि–ट्वन्टी विश्वकप क्रिकेट प्रतियोगिताको यो पाँचौँ संस्करणको खेल हो । प्रत्येक दुई वर्षमा हुने सो प्रतियोगितामा सन् २०१२ मा भएको विश्वकपको उपाधि वेस्टइन्डिजले हात पारेको थियो । अन्तर्रााष्ट्रिय क्रिकेट परिषद् (आइसिसी)ले आयोजना गर्ने उक्त प्रतियोगितामा कुल १६ राष्ट्रले प्रतिस्पर्धा गर्नेछन् ।
