काठमाडौँ फागुन २४, आसन्न वैशाख १८ गतेका राष्ट्रिय सम्मेलनलाई सफल बनाउन आवश्यक काय गर्ने निर्णय सहित एनेकपा (माओवादी)को जिल्ला संयोजकको दुईदिने भेला सम्पन्न भएको छ । पार्टी केन्द्रीय कार्यालय पेरिसडाँडामा हिजो बाट एमाओवादी केन्द्रीय सङ्गठन विभागको आयोजनामा सुरु भएको भेलामा केही जिल्ला संयोजकले नेतृत्वलाइ नेकपा–माओवादी र अन्य साना कम्युनिस्ट पार्टीसँग एकता गर्न समेत सुझाव दिएको बुझिएको छ ।
यस्तै प्रवक्ता दीनानाथ शर्माका अनुसार भेलामा नेताद्वय डा बाबुराम भट्टराई र नारायणकाजी श्रेष्ठले संविधानसभाको मत परिणामका आधारमा निरास नहुन र जनताको सेवामा खुला र स्पष्ट भएर लाग्न निर्देशन दिँदै जनताको बीचमा प्रतिबद्ध भएर लागे फेरि पनि जनताले एमाओवादीलाई साथ दिने विचार राख्नुभएको थियो । भेलामा आएका लिखित र मौखिक सुझावअनुसार केन्द्रीय सङ्गठन विभागले आवश्यक निर्देशन गर्ने निर्णयसमेत गरिएको प्रवक्ता शर्माले जानकारी दिनुभएको छ ।