काठमाडौँ फागुन ११, संविधानसभा÷व्यवस्थापिका–संसद् नियमावली मस्यौदा समितिले व्यवस्थापिका–संसद् कार्यसञ्चालन नियमावलीलाई अन्तिम रुप दिएको छ । समितिको शनिवार बसेको बैठकले व्यवस्थापिका–संसद्सम्बन्धी नियमावलीलाई सर्वसम्मतिले अन्तिम रुप दिएको हो । प्राप्त समाचारमा उल्लेख भएअनुसार संविधानसभासम्बन्धी नियमावलीलाई थप प्रभाकारी बनाउँन प्रस्तावित नियमावलीमा २६ मन्त्रालयका कामकारबाहीलाई हेर्ने गरी विभिन्न १३ विषयगत समिति बनाउने सुझाव दिइएको उल्लेख छ । गत फागुन १ गतेदेखि १० दिनभित्र संविधानसभा (व्यवस्थापिका–संसद्को कार्यसञ्चालन) नियमावली बनाउने गरी तोकिएको समितिको समयावधि शनिवार समाप्त भएकाले थप सात दिनका लागि म्याद थप गर्न आग्रह गरिएको छ । दुई साताअघि संविधानसभाको बैठकले ४९ सदस्यीय मस्यौदा समिति गठन गरेको थियो ।
