उनलाई पार्टी अध्यक्ष महन्थ ठाकुरकै चाहनामा सभासद् बनाइए
काठमाडौंँ फागुन ११, भारतको नगरपरिषद् चुनाव हारेका केदारनन्दन चौधरी नेपालको सभासद् बनेका छन् । तराई मधेस लोकतान्त्रिक पार्टीले चौधरीलाई समानुपातिकबाट दोस्रो संविधानसभामा सभासद् बनाएको समाचार आजको नयाँ पत्रिका दैनिकले भुवन शर्माको वाईलाइनमा समाचार छापेको छ । । सन् २००४ मा भारतमा भएको स्थानीय चुनावमा चौधरीले गाजियवाद जिल्लाको खोना मकानपुर नगरपरिषद् चुनावमा उम्मेदवारी दिएका थिए । चुनावमा उनी पराजित भएका थिए । भारतको नगरपरिषद्मा उम्मेदवारी दिएको १० वर्षपछि चौधरी एकैचोटि नेपालको व्यवस्थापिका–संसद्मा भित्रिएका छन् । सन् २००८ मा गरिएको दोस्रो स्थानीय चुनावमा केदारनन्दनकी कान्छी श्रीमती मीरा चौधरीले सोही नगरपरिषद्मा महिला कोटाबाट उम्मेदवारी दिएर जितेकी थिइन् । सभासद् चौधरीको घर अहिले पनि खोना मकानपुर नगरपरिषद्को खोहरा कोलनीमा रहेको स्रोतले बतायो । चौधरीकी श्रीमती मीरा अहिले पनि उतै बस्छिन् । गाजियावाद भारतको राजधानी नयाँदिल्लीनजिकै पर्छ ।
भारतमा रासनकार्डका लागि त्यहाँको बासिन्दा भएको प्रमाण पेस गर्नुपर्छ । यसका लागि स्थानीय निकायले सिफारिस गर्नुपर्ने हुन्छ । दैनिक उपभोग्य सामानहरू सहुलियत मूल्यमा खरिद गर्न प्रयोग हुने रासनकार्ड निकै महत्त्वपूर्ण कागजात हो । यसैका आधारमा मतदाता नामावलीमा नाम राखिनुका साथै भोटरकार्ड वितरण गरिन्छ । भोटरकार्ड भनेको नागरिकताजस्तै हो । भोटरकार्ड भएकाले चुनाव पनि लड्न पाउँछन् । सभासद् चौधरीका निकट व्यक्तिहरूका अनुसार उनीसँग अहिले पनि भारतको रासनकार्ड छ । भारतको रासनकार्ड हुने व्यक्तिले नेपालको नागरिकता लिन पाउँदैन । नेपालको नागरिकता पाउन रासनकार्ड त्यागेर मात्र हुँदैन, कानुनअनुसार नेपालमा स्थायी बसोबास गरेको प्रमाण पेस गर्नुपर्छ । भारतीय रासनकार्ड रहेका व्यक्तिलाई सभासद् बनाइएको भन्दै तमलोपामा विवादसमेत भएको छ । उनलाई अध्यक्ष महन्थ ठाकुरकै चाहनामा सभासद् बनाइएको तमलोपा स्रोतले बतायो । स्रोतका अनुसार संविधानसभा चुनावमा चौधरीले सर्लाही–६ बाट उम्मेदवारी दिएका पार्टी अध्यक्ष ठाकुरलाई निकै सहयोग गरेका थिए । ‘उहाँ ९चौधरी०ले भारतको स्थानीय चुनावमा उम्मेदवारी दिएर पराजित भएको पत्ता लागेको छ । उहाँसँग अझै पनि भारतको रासनकार्ड रहेको छ,’ तमलोपाका एक पदाधिकारीले नयाँ पत्रिकासँग भने, ‘यो दुर्भाग्य हो ।’ चौधरीको घर सर्लाहीको अचलीगढ गाविसमा पनि छ । सो घरमा उनकी जेठी श्रीमती बस्छिन् । जेठी श्रीमतीको नागरिकता नेपाली छ । स्रोतका अनुसार संविधानसभामा समानुपातिकमा मनोनीत हुनु केही दिन पहिले मात्र चौधरीले गाजियावादमा रहेकी कान्छी श्रीमतीसँग सम्बन्धविच्छेद गरेका थिए । ‘तर, त्यो सम्बन्धविच्छेद कानुनी रूपमा देखाउन मात्र गरिएको हो,’ तमलोपा स्रोतले भन्यो, ‘उनी अहिले पनि भारतमा कान्छी श्रीमतीसँगै बस्ने गर्छन् ।’ हाल पनि सभासद् चौधरी गाजियावादमै रहेको र केही दिनपछि मात्र नेपाल आउने तमलोपा स्रोतले बतायो । उनीनिकट व्यक्तिले भने, ‘समानुपातिकमा सभासद् हुुनुभन्दा पहिले चौधरी बढी समय भारतमै बस्ने गरेका थिए ।
सभासद् भएयता धेरैजसो काठमाडांै र सर्लाहीमा बस्ने गरेका छन् ।’ सर्लाही क्षेत्र नम्बर ६ का तमलोपाका केही नेताहरूले सभासद् चौधरीको दोहोरो नागरिकताबारे केन्द्रमा मुद्दा उठाउने तयारी गरेका छन् । स्रोतका अनुसार चौधरीले खोना मकानपुर नगरपरिषद्मा चुनाव हारेपछि त्यहीँ ठेक्कापट्टाको काम गर्न सुरु गरेका थिए । त्यसमा उनलाई राम्रो आम्दानी भएको थियो । त्यहाँको आम्दानीले उनले नेपालको स्थानीय राजनीतिमा प्रभाव जमाउन खोजेको तमलोपाका एक केन्द्रीय सदस्यले बताए । चुनावमा सहयोग गर्ने आश्वासन दिएपछि तमलोपाले चौधरीलाई समानुपातिकमा नाम सिफारिस गरेको थियो । ‘उहाँ (चौधरी)लाई हाम्रो पार्टी अध्यक्षज्यूले कसरी समानुपातिकमा नाम चयन गर्नुभयो,’ त्यो बुझ्न सकिएन,’ तमलोपाका अर्का एक केन्द्रीय सदस्यले भने । नयाँ पत्रिका