काठमाडौ मंसिर २२,
पशुपति क्षेत्र विकास कोषले आसन्न मंसिर २७ र २८ गते मनाइने बालाचतुर्दशी पर्वको पूर्व सन्ध्यामा अर्थात कृष्ण त्रयोदशीका दिन दिवङ्गत पितृका नाममा पशुपतिनाथ मन्दिर क्षेत्रमा गरिने दीपदान गर्ने कार्यमा रोक लगाउनुको अलावा पशुपति क्षेत्रमा लाग्ने मेला समेत स्थगन गरेको छ ।
सो दिन रातभर पशुपतिमा दीपदान गरी चतुर्दशीका दिन बिहान पशुपति क्षेत्रमा शतबीज छर्ने परम्परा रहिआएको छ । तर यसपटक कोभिड महामारीका कारण दिपदानको क्रममा हुन सक्ने भिडभाडका कारण संक्रमण फैलन सक्ने संभावालाइ दृष्टिगत गर्दै दिपदानको कार्यलाइ रोक लगाएको कोषले जनाएको छ ।
यद्यपी बालाचतुर्दशीका दिन भने भौतिक दूरी कायम गरी स्वास्थ्य सुरक्षाका विधि अपनाएर शतबीज छर्न सकिने कोषले जनाएको छ । त्यस्तै आगामी पुस १गतेबाट भक्तजनको दर्शनका लागि खुला गर्न लागेको पशुपति नाथ मन्दिरमा पनि भौतिक दूरी कायम गरी स्वास्थ्य सुरक्षाका विधि अपनाएर भक्तजनलाई प्रवेश दिइने कोषले जनाएको छ ।
