काठमाडौं मंसिर २०,
गत मंगलबारको बैठकमा पार्टी अध्यक्ष एवं प्रधानमन्त्री केपी ओली अनुपस्थित भएका कारण आजसम्मका लागि स्थगित गरिएको सचिवालय बैठक आज बस्दै छ । बैठक अघि प्रचण्ड र केपी ओलीबीच २५ मिनेटको सम्वाद भएसंगै प्रमको सरकारी निवास बालुवाटारमा पार्टी सचिवालयको बैठक सुरु भएको हो । बैठकमा सहभागी हुन इन्कार गरिरहेको पार्टी अध्यक्ष एवं प्रधानमन्त्री केपी ओली त्यसपछि सहभागी भएको हो ।
३ घण्टादेखि बालुवाटारमा जारी नेपाल कम्युनिस्ट पार्टीको सचिवालय बैठक सकिएको छ । आजको बैठकमा अध्यक्षद्वयले पेश गरेका राजनीतिक प्रतिवेदनमाथि छलफल सुरु भएको नेकपाका प्रवक्ता तथा सचिवालय सदस्य नारायणकाजी श्रेष्ठले जानकारी दिए ।
बैठकमा सदस्यहरुले राजनीतिक प्रतिवेदनमाथि आ–आफ्नो धारणा राखेका थिए । श्रेष्ठका अनुसार आजको सचिवालय बैठकले पूर्वनिर्धारित मंसिर २१ गते १ बजे पार्टीको केन्द्रीय कार्यालयमा स्थायी कमिटीको बैठक बसेर पार्टीभित्रको संकट समाधानका विषयमा छलफल हुने निर्णय भएको जानकारी दिनुभएकोछ ।