काठमाडौं माघ २ बिहीबार राजधानीमा चाँगुनारायणको जात्रा सम्पन्न भएको छ । चाँगुनारायण, लक्ष्मी र सरस्वती प्रतीकको स्वरूप तीनवटा कलशलाई भक्तपुरको चाँगुबाट तीनजनाले बोकेर जमल पाटी पुर्याएका थिए । त्यहाँ सरकारी तर्फबाट पूजा सकिएपछि राजखड्ग, शार्दूलजंग पल्टनका साथ कमलादी, असन, इन्द्रचोक र मखन हुँदै ती कलशलाई हनुमानढोका पुर्याइएको थियो । पूजाका क्रममा हनुमानढोकाको मूलचोकमा होम गरिएको थियो । त्यसरी होम गरिएको आगोको ज्वाला चाँगुडाँडाबाट देखिनुपर्छ भन्ने जनश्रुति छ ।
त्यसपछि राष्ट्रपतिलाई प्रसाद दिन र दर्शन गराउन तीनवटै कलशलाई शीतल निवास पुर्याइएको थियो । राष्ट्रपति रामवरण यादवले चाँगुनारायण, सरस्वती र लक्ष्मीको दर्शन गरी प्रसाद ग्रहण गरेका थिए । चाँगुनारायण देश छोडी नजाऊन् भनेर माटोको भाँडा फुटाई अपशकुन देखाउने परम्परा रहेको जानकारको भनाइ छ ।