काठमाडौ मंसिर २०, राष्ट्रिय मानवअधिकार आयोगले विहिवार ४५ जिल्लामा हुने प्रतिनिधिसभा र प्रदेशसभाको निर्वाचनको अनुगमन कार्यलाई थप प्रभावकारी र विश्वसनीय बनाउन आयोगका अध्यक्ष अनुपराज शर्माको नेतृत्वमा राष्ट्रिय मानवअधिकार आयोग ऐन २०६८ अनुरुप उच्चस्तरीय अनुगमन टोली गठन गरेको छ ।
अध्यक्ष शर्माको नेतृत्वमा मानवअधिकारकर्मी, महिला अधिकारकर्मी, नागरिक समाज, कानून व्यवसायी संयुक्त राष्ट्रसंघका लागि नेपालका पूर्वस्थायी प्रतिनिधि संलग्न रहेको उच्चस्तरीय अनुगमन टोली गठन गरिएको आयोगका प्रवक्ता मोहना अन्सारीले आज जारी विज्ञप्तिमा उल्लेख गरिएको छ ।
त्यस्तै विज्ञप्तिमा आयोगले निर्वाचन सुरक्षा व्यवस्था तथा मानवअधिकारको उचित सम्मान र संरक्षणका लागि निर्वाच आयोग र सरकारका गृहसचिव तथा सुरक्षा निकायका प्रमुखबीच छलफल गर्दै प्रस्तुत निर्वाचनलाइ शान्तिपूर्ण तथा मानवअधिकारमैत्री बनाउन सुरक्षा निकायका प्रमुखलाई आग्रह गर्नुभएको उल्लेख गरिएको छ ।